A TVG emite esta tarde un documental sobre a figura de Isaac Díaz Pardo

EMMA SOLA

SANTIAGO. En 55 minutos un documental coproducido pola TVG e EAF dá conta dos feitos máis destacados da biografía de Isaac Díaz Pardo, un dos máis destacados personaxes vivos da Historia de Galicia. Baixo a dirección de Xosé Abad e con guión de Carlos Vázquez, a cinta persuegue mostrar sen artificios o pensamento, a opinión e os sentimentos do intelectual sobre o seu tempo, o seu mundo e o seu país.

Con 87 anos cumpridos, Díaz Pardo, fundador, promotor e primeiro traballador de Sargadelos, Edicións do Castro e o Instituto Galego de Formación mantén a toda a lucidez e ofrece unhas verbas admirablemente comprometidas e libres sobre temas coma a emigración e a inmigración, a economía ou a Guerra de Irak. Un capítulo destacado neste repaso pola súa traxectoria son as súas lembranzas da República e a Guerra Civil.

Segundo os responsables da cinta, o formato permite achegar a figura de Isaac Díaz Pardo e os grandes referentes da Historia de Galicia de xeito amable e próximo a todos os públicos, apoiándose nos sentimentos, a ironía e o sentido do humor. O obxectivo é profundizar nos acontecementos que estamos a vivir hoxe no mundo e os que viviu a súa xeración. Participa neste percorrido unha pequena parte, pero ben significativa, dos amigos deste persoeiro principal das artes, a política e a cultura galega do século XX.